Ashtu siç ishte paralajmëruar, edhe ditën e sotme qytetarët janë mbledhur para kryeministrisë për të protestuar kundër rritjes së çmimeve. Avokati Adriatik Lapaj është shprehur se nga kjo protest qytetarët marrin një mësim të madh dhe i ka bërë thirrje politikës të reflektojë. Ai tha se kryeministri reflektoi për energjinë elektrike dhe çmimi nuk u rrit, ndërsa sot protesta është për çmimin e bukës, ushqimit të shportës, karburanteve, por edhe për të ngritur zërin për meritokraci
“Kryeministri reflektoi për energjinë elektrike, por kjo nuk mjafton. Sot jemi dhe për çmimin e bukës, ushqimit të shportës, karburanteve, por edhe për të ngritur zërin për meritokraci, për drejtësi sociale dhe për të kërkuar që në këtë vend të marrë fund tranzicioni i stërzgjatur ku ndahen në dy kampe shqiptarët. Çdo qytetar që e ndjen se duhet të protestojë, le ta bëj atë. Misioni që duhet të kemi është që qytetarët të reagojnë për veten e tyre.
Nuk themi dot se sa sukses do të ketë kjo, por një sukses të parë e kemi, energjia elektrike nuk do të rritet për familjarët dhe bizneset. Se sa sukses do të ketë, nuk e di, por në dorë kam përpjekjen time të sinqertë. Qytetarët marrin këtë mësim të madh dhe politika t’i vendosë gishtin kokës”, ka thënë Lapaj.
