Tashmë është e konfirmuar edhe nga autoritetet përkatëse se personi që është ekzekutuar mbrëmjen e sotme pranë shkollës “Petro Nini Luarasi” është Jurgen Kurti.
Kurti nuk ka qenë një emër i panjohur për policinë, por mbi të gjitha nuk është edhe një emër i panjohur për median, ku edhe jo pak herë pa qenë protagonist.
Si fillim, Jurgen Kurti është njohur si 23- vjeçari i pasur i cili i kishte kaluar kufijtë e metropolit duke krijuar miqësi edhe me artistë të huaj, prej nga u njoh edhe si menaxher i VIP-ave.
Megjithatë nuk do të zgjaste shumë, pasi në vitin 2016 arrestohet së bashku me dajën e tij, Leonard Ristanin për vrasjen e të atit, Artur Kurtit.
Mirëpo pas disa kohësh që Jurgeni kishte kaluar në burg, daja i tij mori përsipër autorësinë e vrasjes dhe i riu u lirua nga të gjitha akuzat.
Mirëpo nuk do të mjaftonte me kaq. Vetëm një vit më vonë do të përfshihej në një tjetër vrasje, atë të Agim Arapit, pronarit të një picerie në Durrës.
Ai u arrestua së bashku me vjehrrin e tij, Konstadin Ekonomi dhe vëllanë e tij, Kujtim Ekonomi për vrasjen për motive pronësie.
Por pas verifikimit të pamjeve filmike e provave në vendin e ngjarjes rezultoi se vrasja është realizuar nga dy vëllezërit Ekonomi për motive të dobëta, ndërkohë që dhëndri i njërit prej vëllezërve, Jurgen Kurti nuk ka qenë i përfshirë në ngjarjen e rëndë, kështu që u lirua.
