Zv/kryeministri Arben Ahmetaj deklaroi ditën e sotme se çmimet e energjisë nuk do të rriten në Shqipëri dhe se ditët në vazhdim kryeministri Edi Rama do të paraqesë një plan të detajuar masash për të dalë nga kriza energjetike.
Pa marrë parasysh se vendi është realisht duke kaluar një moment të vështirë që ka ndikuar thellësisht në jetët e qytetarëve, Ahmetaj ka vazhduar me deklarata të tipit populist që vetëm çorientojnë e manipulojnë opinionin publik.
Siç e ka vënë edhe më parë në dukje Gazeta Reforma, kriza që paralajmëron kryeministri e qeveria është vetëm pasojë e keqmenaxhimit dhe abuzimit nga korrupsioni e mbi të gjitha politikave bllokuese për hidrocentralet e gjithë industrinë e prodhimit të energjisë, që së bashku me turzimin përbëjnë shtyllat e ekonomisë shqiptare.
Aparati propagandistik që qeveria ka ngritur përpiqet vetëm të bindë qytetarët dhe bizneset e vogla se këta do të jenë prioritet dhe shteti do t’i ndihmojë.
Ndërkohë që çmimet luhaten në mënyrë të pakontrolluar, justifikimi i qeverisë është “se nuk jemi në komunizëm që të fiksojë çmimet”. Por ndërkohë, në fusha të caktuara të ekonomisë janë oligarkët me bizneset e tyre ata që i fiksojnë çmimet dhe qeveria nuk lëviz as gishtin për këtë gjë.
Ndërkohë që kjo industri shkatërrohet, janë qytetarët ata që kanë paguar e do vazhdojnë ta paguajnë faturën.
Qeveria ka nisur prej kohësh bllokimin e falimentimin dhe me anë të propagandës i ka etiketuar sipërmarrësit e guximshëm shqiptarë si hajdutë e shfrytëzues. Ndërkohë, këta njerëz me guxim e sakrifica dhe pengesa të pafunda që qeveria ka vendosur përballë tyre, kanë sjellë vetëm të mira për shoqërinë e popullin shqiptar, të cilin po kjo qeveri pretendon se do e mbrojë.
Dhe mënyra si qeveria e konsideron “mbrojtjen” e qytetarëve është nëpërmjet rritjes së taksave e duke përdorur para pa fund nga buxheti i shtetit, i cili do vijë një pikë e nuk do të përballojë më çdo vjedhje e abuzim.
Qeveria është shumë vonë për t’i ndihmuar shqiptarët, pasi është pikërisht ajo që i ka lënë në një gjendje të vështirë dhe me mundësi të pakta për një jetesë dijnitoze. E vetmja gjë që qeveria është duke bërë, është një propagandë e tipit diktatorial, për t’i bindur njerëzit se është duke punuar fort për prosperitetin e tyre.
Tashmë është shumë vonë, sepse sot Ahmetaj harroi në fakt të përmendte se shumë çmime janë rritur. Qytetarët tashmë paguajnë më shumë për bukën, paguajnë më shumë për kafen, karburantet e së shpejti edhe për energjinë.
Ahmetaj po ashtu ra në kundërshti me deklaratat e Ramës, i cili paralajmëroi disa ditë më parë se do të ketë rritje të çmimeve. Tani jo vetëm që qytetarët do detyrohen të paguajnë më shumë, por do të jenë të detyruar të dëgjojnë edhe propagandën e pashembullt të qeverisë, që thotë se është duke e bërë çdo gjë mirë.
