Komisioni i Sigurisë ka filluar tashmë prej dy orësh dhe gjatë mbledhjes Ministri i Brendshëm, Blendi Çuçi është pyetur nga deputeti i opozitës Luan Baçi për shkarkimin e Drejtorit të Përgjithshëm të Policisë së Shtetit, Ardi Veliu.
Në fjalën e tij, ministri Çuçi nuk ka dhënë një argument bindës duke e pohuar një lajm të tillë por thjesht ka lënë një përgjigje evasive.
“Do e merrni vesh në momentin e duhur. Kur t‘i mbaroj kandili.”- tha Çuçi.
Shkarkimi i Drejtorit të Përgjithshëm të Policisë së Shtetit, ka ardhur në një moment kur ngjarjet kriminale në vend janë shtuar, duke rritur kështu pasigurinë. Kujtojmë këtu ngjarjen e rëndë që ndodhi në 8 dhjetor të vitit 2020 ku 25-vjeçari Klodian Rasha u vra nga një efektiv i policisë. Qindra qytetarë dolën duke protestuar përpara ndërtesës së komisariatit, duke shkaktuar protesta në shumë qytete si Tiranë, Korçë, Shkodër dhe Durrës ku madje dhe ministri i Brendshëm Sandër Lleshaj dha dorëheqjen. Përpara ndërtesës së komisariatit të rinjtë ndezën qirinj dhe më pas hodhën shashka e sende të forta në drejtim të godinës. Ndërsa jo më larg se dje në Elbasan ndodhi një vrasje e dyfishtë ku u ekzekutuan me breshëri plumbash Ardian Çollaku dhe Lulzim Bitri ndërsa në Vermosh u rrëzua një avion që dyshohet se po transportonte lëndë narkotike.
Kujtojmë se Veliu është emëruar në postin e tij “Drejtor i Përgjithshëm i Policisë së Shtetit” në vitin 2018.
Sipas informacioneve të marra mësohet se Ardi Veliu u shkarkua pas afatit 100 ditor që kryeministri Edi Rama kishte caktuar ndaj tij për punën e dobët të Policisë së Shtetit.
Sakaq, në mbledhjen e fundit që kryeministri pati para drejtorëve të Policisë kërkoi reagim dhe la një afat 100 ditor për të riorganizuar punën e Policisë së Shtetit.
“Keni 100 ditë kohë për ta rivënë të gjithë trupën në angazhim maksimal nga i pari tek i fundit. Asnjë ditë më shumë. Që qytetarët të marrin frymë shumë të lehtësuar duke e parë Policinë e Shtetit në një nivel tjetër. Asnjë shkencë, asnjë shpikje, asnjë luftë me të panjohur, thjesht dhe vetëm gjërat që i dini, gjërat që njerëzit duan si themelin e marrëdhënies me shtetin. Kjo duhet bërë në respektin e vetes, masës dërrmuese të trupës që është korrekte dhe nuk ka pse t’i paguajë kostot një pjesë që duhet zhdukur nga Policia e Shtetit dhe duhet të shkojë përpara përgjegjësisë. Në çdo qark në 100 ditë duhet të jepen shembuj të qartë, nuk mund të ketë komisarë që luajnë me dy porta dhe ju nuk e keni fare problem as t’i kapni. Ky është një objekt i palëvizshëm në çdo qark”, tha Kryeministri Edi Rama.
