Nënkryetari i Partisë Demokratike, Enkelejd Alibeaj pas dorëzimit të kërkesës për ngritjen e Komisionit Parlamentar, për zgjedhjet e 25 prillit, ka dhënë një deklaratë për mediat.
Alibeaj është shprehur se Partia Demokratike e ka detyrim jo vetëm ndaj zgjedhësve të saj, por edhe ndaj të gjithë qytetarëve që të hetojë masakrën zgjedhore të ndodhur më 25 prill, ndërkohë që ka evidentuar dhe problematikat më të mëdha në këtë aspekt.
Gjithashtu Alibeaj ka treguar edhe nëntë pikat që sipas tij kanë nevojë urgjente që të hetohen.
“Së bashku me kolegët kemi dorëzuar kërkesën për ngritjen e një komisioni hetimor për masakrën zgjedhore që ndodhi në 25 Prill. Është një nevojë ulëritëse që sistemi demokratik kërkon, disa nga çështjet kryesore që meritojnë dhe do të hetohen, në transparencë të plotë me publikun:
- Mbyllja e kufijve, duke iu bërë të pamundur emigrantëve votimin
- Legalizimi i 10 mijë banesave
- Shtesa e ndihmës ekonomike vetëm disa muaj para zgjedhjeve, 20 mijë familje u rifutën në skemë, për tiu blerë votat përmes varfërisë
- Punësimi i më së paku 13 mijë shqiptarëve me kontrata të përkohshme, në këtë vend që vetëm ikin njerëzit për shkak të papunësisë.
- Rritja e rrogave për administratën, e cila është kthyer në një skuadër të PS, këta njerëz përdoren vetëm në periudhën e fushatave zgjedhore
- Do të hetohen 120 milionë të asfaltit elektoral
- Do të hetohen 505 milionë tendera, koncensione, që 878 kontrata, në vitet e tjera ka qenë një shifër tre herë më e vogël. Periudha pas pandemisë, ku lëngonte familja shqiptare, por u gjetën paratë për tiua shpërndarë një grupi të madh njerëzish të përzgjedhurish, të cilët punuan në fushatë për qeverinë.
- Fondet publike për tërmetin, fatkeqët dy dimra i kaluan jashtë, dhe u bënë me shtëpi vetëm disa javë para zgjedhjeve.
- Do të hetohet dhe ajo që është qershia mbi tortë, do të hetohet spiunazhi modern. Në 2021 në këtë vend edhe njëherë rikthehen makthet e regjimit të para 90-tës.”, ka thënë Alibeaj.
