Deputeti i Partisë Demokratike, Flamur Noka ka dalë sërish hapur kundër kryedemokratit Lulzim Basha. Në një prononcim për mediat, Noka ka thënë që Kongresi dhe Kuvendi i PD do të mblidhet kundër Lulzim Bashës, ndërsa e cilësoi këtë organ minorancë dhe që nuk përfaqëson shumicën e partisë.
“Ajo që i bëra me dije është se Kongresi i PD do mblidhet, Kuvendi do mblidhet, nuk mblidhet për të shqyrtuar asnjë vendim të SHBA-ve. Ky Kuvend do mblidhet kundër Lulzim Bashës, që është minorancë, ilegjitim dhe nuk përfaqëson shumicën e PD-së”, tha Noka.
Deputeti tregoi ndër të tjera se Basha është duke bërë presion ndaj drejtuesve të degëve, në mënyrë që të mos presin ish-kryeministrin Sali Berisha, në turin që ky i fundit ka nisur në qytete të Shqipërisë për të takuar demokratët. Noka e quajti këtë veprim të neveritshëm, ndërsa tha se tregon panikun që e ka zënë kryetarin.
“Ka disa ditë që ka filluar një tur takimesh me drejtuesit duke i thirrur këtu, duke i presionuar dhe duke u ushtruar shantazh për të mos i hapur dyert liderit historik të PD-së. Kjo nuk është thjesht e turpshme, por neveritshme, tregon panikun që e ka zënë kryetarin nga lëvizja e demokratvve”, u shpreh Noka.
