Dita pa makina më 17 Mars: Ja ku do të ndalohet qarkullimi

17 Marsi është shpallur dita pa makina, duke e kthyer bulevardin “Dëshmorët e Kombit” në pedonale për shëtitje kështu që bëni mirë t’i lini makinat  në shtëpi.

Bashkia e Tiranës dhe Policia e Shtetit kanë marrë një plan masash për organizimin e aktiviteteve për festimin e Ditës së Verës, ku tregohet se si do të devijohet qarkullimi i mjeteve këtë të diel.

Ditën e diel, më 17 mars, do të ndalohet qarkullimi i automjeteve në Bulevardin “Dëshmorët e Kombit” nga ora 08:00 deri në orën 17:00. Gjithashtu, do të ndalohet qarkullimi në sheshin “Nënë Tereza” nga data 16.03.2019 ora 19:00 deri në datën 18.03.2019 ora 00:00, si dhe në rrugën “Pjetër Bogdani” dhe “Brigada e VIII”, segmenti i rrugës midis “Vaso Pashës” dhe “Ibrahim Rugovës” në datë nga ora 08:00 deri orën 04:00 datës 18 Mars.

Për automjetet e emergjencës dhe të Policisë së Shtetit, qarkullimi do të bëhet në rrugët: “Ibrahim Rugova”, “Vaso Pasha” dhe “Papa Gjon Pali II”, në Unazën e Vogël të qytetit.

Ndërkaq, qarkullimi i mjeteve të transportit urban të qytetit do të devijohet si më poshtë:

• Linja e Unazës do të devijohet në Urën e rrugës “Sami Frashëri” me urën e rrugës “Elbasanit”.

• Linja “Tirana e Re” do të devijohet në rrugën “Sami Frashëri”.

• Linja Kinostudio-Kombinat do të devijohet tek Sheshi “Medresesë” si dhe përballë kishës Ortodokse në rrugën e “Kavajës”.

Burimi:Iconstyle.al