Mbrëmjen e sotme kanë mbërritur në vendin tonë dozat e radhës të vaksinave Pfizer. Lajmin e ka bërë të ditur ministrja e Shëndetësisë, Ogerta Manastirliu, e cila njofton se numri total i vaksinave anticovid të mbërritura në Shqipëri ka shkuar në 2,045,310 sasinë
“Edhe 31,590 doza vaksine Pfizer mbërritën pak më parë në Aeroportin “Nënë Tereza”, duke e çuar në 2,045,310 sasinë e vaksinave anticovid që kanë mbërritur deri tani në vendin tonë. Vaksinim, Vaksinim, Vaksinim”, shkruan Manastirliu në një postim në Facebook.
Ndërkohë, ditën e sotme ministrja Ogerta Manastirliu bëri me dije se fokusi është që numri i vaksinimeve të rritet në mënyrë që të shpëtohen sa më shumë jetë. Ajo gjithashtu njoftoi se është duke u punuar për lidhjen e një kontrate me kompaninë Pfizer për 500 mijë vaksina që pritet të vijnë në tremujorin e fundit të vitit.
Kujtojmë që rastet me Covid-19 në vendin tonë kanë ardhur në rritje gjatë dy muajve të fundit, për shkak të pranisë të variantit Delta. Ditën e sotme u raportuan 451 infektime me virusin, ndërsa humbën jetën 7 qytetarë. Aktualisht në Spitalet COVID po marrin trajtim 242 pacientë, nga të cilët 22 janë në gjendje më të rënduar. Numri total i rasteve aktive është 12,700, ndërsa janë shëruar 148,117 persona.
