Shërbimi për Çështjet e Brendshme dhe Ankesat ka sqaruar se ka arritur të parandalojë një tentativë për sulm kibernetik në serverat qendror të institucionit. SHÇBA bën me dije se nga ndërhyrja e shpejtë është bërë e mundur që sulmi të bllokohet në kohë e të mos ketë asnjë dëmtim apo rrjedhje informacioni të Shërbimit. Ndër të tjera, bëhet me dije se është duke u punuar nga specialistët IT për rritjen e sigurisë së mëtejshme të të gjitha sistemeve dhe rrjetit të Shërbimit.
“Sqarim për media
Në përgjigje të interesit të medias, sqarojmë se specialistët pranë Sektorit të Teknologjisë dhe Informacionit (IT) në Drejtorinë e Përgjithshme të Shërbimit për Çështjet e Brendshme dhe Ankesat (SHÇBA) kanë arritur të parandalojnë një tentativë për sulm kibernetik në serverat qendror të institucionit.
Nga ndërhyrja e shpejtë dhe në kohë është bërë i mundur bllokimi i këtij sulmi duke mos lejuar asnjë dëmtim apo rrjedhje informacioni të Shërbimit. Aktualisht, specialistët e IT po punojnë për rritjen e sigurisë së mëtejshme të të gjitha sistemeve dhe rrjetit të Shërbimit.
Duke falënderuar për mirëkuptimin dhe besimin ndaj SHÇBA, lutemi që për çdo ankesë të telefononi në numrin e gjelbër (pa pagesë) 08009090”, thuhet në një reagim të SHÇBA.
Megjithatë, është ditur se SHÇBA nuk është institucioni më i besueshëm i mundshëm. Duke marrë parasysh rastet e shumta të korrupsionit, kjo të bën të mendosh se “paaftësia” e këtij institucioni nuk mund të ndalë as sulmet kibernetike. Kjo pasi, nëse nuk janë në gjendje të zgjidhin problemet e brendshme, nuk mund të përballen as me raste të tilla. Por pavarësisht kësaj, SHÇBA e reklamon ndalimin e këtij sulmi kibernetik si një sukses të madh.
