Sekretari i Përgjithshëm i Partisë Demokratike, Gazmend Bardhi ka komentuar për herë të parë vendimin e kreut të PD-së, Lulzim Basha për përjashtimin e ish-kryeministrit Sali Berisha nga grupi Parlamentar.
Mbrëmjen e sotme në emisionin “Open”, Bardhi është shprehur se ka qenë i pranishëm në takimin që ka zhvilluar Basha me zyrtarët amerikanë dhe sipas tij nuk ka pasur një rrugë tjetër, pasi në qoftë se Basha nuk do të merrte një vendim interesat e demokratëve sipas tij, do të ishin prekur në mënyrë të parikuperueshme.
Gjithashtu Bardhi ka theksuar se Basha e ka mbrojtur ish-kryeministrin, Sali Berisha dhe se nuk do të donin që të ishin ën këtë situatë. Gjithashtu ai ka thënë se nuk ka më betejë mes Bashës dhe Berishës, por beteja është me Ramën.
“Nuk ka përjashtim të Sali Berishës nga Partia Demokratike. Si çdo demokrat, ky vendim lëndon, por para se të japim një vendim emocional duhet që secili nga ne, nisur nga Basha deri te anëtari më i thjeshtë, duhet të kemi parasysh interesin e demokratëve. Kjo ishte e vetmja rrugë nga informacionet që unë kisha, ishte i vetmi opsion për situatën e krijuar. S’do donim kurrë të ishim në këtë situatë.
Sot vendi ka një minues të demokracisë dhe ai është Edi Rama. Dua të ndaj dhe një informacion, që drejtimi i gishtit te PD sikur e keqja është aty, por e keqja është Edi Rama. Këtu nuk ka një betejë mes Bashës dhe Berishës, Basha ka marrë një vendim i diktuar nga rrethanat në të cilat ishte PD, dhe në atë vendim ka shprehur vlerësimin ndaj figurës së Berishës . Zyrtarisht në prezencë të zyrtarëve amerikanë Basha e ka thënë mos dakordësinë për vendimin e SHBA, ka mbajtur qëndrim në emër të PD në mbrojtje të Berishës. Berisha është në dijeni të rreziqeve që i kanoseshin demokratëve në rast mos vendimi. Unë jam dëshmitar i takimeve të Bashës me amerikanët , nuk jam i lejuar të nxjerr detaje , por konfirmoj se në rast se Basha s’do merrte vendimin interesat e demokratëve do ishin cënuar në mënyrë të parikuperueshme”, tha Bardhi.
