Ministrja e Infrastrukturës dhe Energjisë, Belinda Balluku ka bërë me dije se gjatë mandatit të tretë do të nisë kantieri për aeroportin e Vlorës. Ajo njoftoi se gara për aeroportin e Sarandës është hapur dhe parashikohet që të dorëzohet në pranverën e vitit 2025. Balluku tha se Brenda 24 muajsh do të përfundojë gjithë Unaza e Madhe e Tiranës dhe gjithashtu bëri me dije se sektori hekurudhor do të ketë një vëmendje të veçantë.
“Pyetja që më është drejtuar është për projektet që do të nisën, e cilat do të ndërtohen brenda mandatit të trete. Siç jeni në dijeni, i kemi bërë garat publike, do të ndaloja tek portet. Porti i Durrësit do të kthehet në një zonë për banim, por edhe për marinën elitare. Edhe ky projekt do të financohet në fazën e parë dhe të dytë. Porti i Vlorës, do të kthehet në një port jahtesh. Ai komercial do të zhvendoset në Triport. Do krijohet një zonë ekonomike. Kemi parashikuar që të kemi mbështetje në lëvizje hekurudhore. Do të nisim kantierin në aeroportin e Vlorës. Po përmbushen paketat siç është studiumi i ambientit dhe më pas do të bëhet zona e destinuar. Kemi hapur garën për aeroportin e Sarandës na rezulton se do të përpunojë kapacitete nga muaji prill në tetor për t’i dhënë suport rivierës. Do të na duhen 24 muaj për ndërtim. Parashikohet që edhe ky aeroport të dorëzohet në pranverën e vitit 2025. Brenda shtatorit nis ndërtimi i hekurudhës. Javën e ardhshme në Tiranë do të kemi delegacion nga Banka e Investimeve. Bypassi i Elbasanit, ishte një nga pyetjet. E kemi diskutuar dhe Bashkia ka qenë në kontakt me firmën. Brenda 24 muajsh do të mbyllim të gjithë unazën e madhe të Tiranës. Sektori hekurudhor duke pasur dhe vëmendje të veçantë nga KE kemi arritur që të përmbyllim fazën përgatitore të projektit të parë Tiranë-Durrës, dhe jemi në një fazë përfundimtare dhe kantieri nis në fund të shtatorit për këtë hekurudhë. Jemi në një fazë të avancuar negociatash për hekurudhën Vorë-Han i Hotit”, tha Balluku.
