Dy aksidente kanë ndodhur ditën e sotme në miniera, konkretisht një në Bulqizë e një në Martanesh. Si pasojë e aksidentit në Bulqizë, ka marrë dëmtime të lehta një 29-vjeçar, A. B. banues në Bulqizë. Materialet i janë referuar Prokurorisë për “Ngjarje Aksidentale”. Si pasojë e aksidentit në minierën e Martaneshit, është plagosur lehtë Sh.Gj., banues në Krastë,.
Është për t’u theksuar se aksidentet në miniera në vendin tonë dhe në jo pak raste rezultojnë në pasoja tragjike si plagosje të rënda apo edhe vdekja e minatorëve. Aksidente të tilla ndodhin shpesh për mungesë të kushteve të sigurisë në vendin e punës.
Njoftimi i policisë:
Nga specialistët për Hetimin e Krimit në Komisariatin e Policisë Bulqizë, u referuan materialet procedurale në Prokurorinë Pranë Gjykatës së Shkallës së Parë Dibër, për ‘Ngjarje Aksidentale’, pasi shtetasi A. B., 29 vjeç, banues në Bulqizë, gjatë punës në një galeri kromi në Bulqizë, është aksidentuar dhe për pasojë ka marrë dëmtime të lehta.
Gjithashtu janë referuar materialet procedurale në Prokurorinë Pranë Gjykatës së Shkallës së Parë Dibër, për ‘Ngjarje Aksidentale’ pasi shtetasi Sh.Gj., banues në Krastë, gjatë punës në një galeri kromi në Krastë, Martanesh, është aksidentuar dhe për pasojë ka marrë dëmtime të lehta.
