Një ngjarje tronditëse ka ndodhur në qytetin e Fierit në orët e vona të mbrëmjes. Krimi në familje ka goditur sërish, këtë herë në fshatin Zhupan, ku 31-vjeçari Elton Metaj ka vrarë me armë zjarri ish-bashkëshorten e tij, Sabrina Bega. Menjëherë pas krimit të rëndë ai është arratisur, ndërsa policia ka ngritur pika kontrolli për kapjen e tij.
Njoftimi i policisë:
Rreth orës 22:50, në fshatin Zhupan, shtetasi E. M. (B)., 31 vjeç, në banesën e ish-vjehrrit, ka vrarë me armë zjarri ish-bashkëshorten e tij, shtetasen S. B.
Në vendngjarje kanë shkuar shërbimet e Policisë dhe po punojnë për kapjen e autorit dhe zbardhjen e plotë të ngjarjes.
Janë ngritur pika kontrolli në hyrje-dalje të qytetit dhe vijon krehja e zonës për kapjen e 31-vjeçarit.
Mirëpo, vrasja e Sabrina Begës është një krim i paralajmëruar. Në shtator të vitit të kaluar Metaj e kishte marrë peng ish-bashkëshorten, duke bërë që të ndërhyjnë forcat RENEA për shpëtimin e saj. Ai qëlloi dy herë me armë zjarri në oborrin e banesës së ish-vjehërrit dhe u vetëdorëzua pas 5 orë negociatash. Nuk dihet arsyeja pse Elton Metaj nuk ishte pas hekurave, pas ngjarjes së ndodhur vitin e kaluar, ndërsa sot, liria e tij rezultoi në tragjedi.
