Presidenti Ilir Meta ka reaguar në lidhje me ngjarjen e rëndë që ndodhi në Tetovë mbrëmjen e sotme, ku u përfshi nga flakët spitali Covid. Meta tha se po e përcjell tragjedinë me trishtim të thellë, ndërsa e quajti ngjarjen tronditëse, veçanërisht për numrin e viktimave të raportuara.
Presidenti Meta ka shprehur ngushëllimet për jetët e humbura dhe thotë se ndan dhimbjen e madhe me familjarët e tyre. Ndërtë tjera, ai u ka uruar shërim të shpejtë të lënduarve, ndërsa shprehu solidaritetin me autoritetet shtetërore të Maqedonisë së Veriut, që po bëjnë përpjekje maksimale për të shpëtuar sa më shumë jetë dhe vënë nën kontroll situatën.
Mesazhi i plotë:
Me shqetësim dhe trishtim të thellë po përcjell tragjedinë e ndodhur në spitalin e Tetovës.
Një ngjarje tepër e rëndë dhe tronditëse, veçanërisht për numrin e viktimave të raportuara!
Shpreh ngushëllimet më të ndjera për jetët e humbura dhe ndaj dhembjen e madhe me familjarët e tyre.
Ju uroj shërimin sa më parë të lënduarve!
Shpreh solidaritetin e plotë me autoritetet shtetërore të Maqedonisë së Veriut, që po bëjnë përpjekje maksimale për të shpëtuar sa më shumë jetë dhe vënë nën kontroll situatën.
Mendimet dhe lutjet e mia janë me Tetovën!
