Asambleja e Partisë Socialiste e mbajtur ditën e sotme ka shkaktuar jo pak surpriza tek kandidatët e zgjedhur për të drejtuar në qeverinë e re. Njëri prej tyre ishte edhe mbajtja e të njejtit post nga Niko Peleshi, i cili vazhdon të mbajë postin e Ministrit të Mbrojtjes.
Pas rikonfirmimit të tij në postin e ministrit të Mbrojtjes, Niko Peleshi ka dhënë një deklaratë për mediat, ku është shprehur se është i vetëdijshëm se nuk është i pazëvendësueshëm.
Më tej ai u pyet edhe për vendimin e kryeministrit Rama lidhur me transferimin e Taulant Ballës në qarkun e Fierit. Përsa i përket kësaj pjese, Peleshi tha se e shihte me sy ndryshe këtë lëvizje pasi sipas tij, gjithsecili ka detyrë të luajë role të ndryshme.
“Unë kam prej 8 muajsh që shërbej në këtë pozicion por kur fillon një mandat i ri fillon një qeveri e re. Nuk më ka gënjyer mendja se jam i pazëvendësueshëm. Kemi borxhe për të kthyer. Shqiptarët nuk kanë votuar që unë të bëhem ministër, por për PS. Jam i vetëdijshëm për këtë.
Unë i bashkohem komenteve të mira për punën e Taulant Ballës si kryetar grupi dhe drejtues qarku. Unë nuk e lexoj si ju. Ne nuk jemi të pazëvendësueshëm dhe kemi detyrë të bëjmë role të ndryshme”– u shpreh Peleshi.
