Granit Xhaka ka rezultuar pozitivë me COVID-19. Lajmin e ka bërë të ditur Federata zvicerane e futbollit, e cila ka njoftuar se Xhaka i ka shfaqur simptomat mëngjesin e sotëm dhe nuk ka luajtur as në miqësoren që kanë pasur ndaj Greqisë.
Kujtojmë se Zvicra pret Italinë më 5 shtator në Bazel, por llogaritë e formacionit duhet të bëhen pa kapitenin Xhaka.
Gjithashtu më 8 shtator Zvicra do të luajë me Irlandën e Veriut. Për Xhakën do të bëhet një tentativë të enjten me një test PCR dhe në rast se rezulton negative, atëherë ai mund të rikthehet të luajë.
Nga ana tjetër, Xhaka rezulton të mos ketë infektuar asnjë nga kolegët e tjerë tek Zvicra që ose kanë qenë të shëruar ose të vaksinuar ndaj COVID-19. “Xhaka u diagnostikua me simptoma në mëngjes, teksa u izolua menjëherë në dhomën e tij. Një test i shpejtë doli negativ, ndërsa më pas testi PCR, që u krye për efekt sigurie, prodhoi një rezultat pozitiv gjatë pasdites.
Ai do të zhvillojë një tjetër test PCR gjatë të enjtes. Mjeku përgjegjës në kantonin e Bazelit nuk ka urdhëruar masa të tjera për skuadrën pasi lojtarët ose janë të vaksinuar, ose kanë kaluar COVID-19. Një pjesëtar i stafit u desh të niste karantinën”, shpjegoi Federata Zvicerane.
