Vrasja e 18-vjeçares Marigona Osmani ka qenë tronditëse për të gjithë, po ashtu edhe për familjarët e autorit të ngjarjes. Vëllai i Dardan Krivaqës, Kastrijot Krivaqa ka reaguar në lidhje me ngjarjen e rëndë, duke kërkuar dënimin maksimal.
Ai thotë se i vëllai u ka sjellë gjithë jetën telashe dhe probleme dhe asnjëherë nuk i ka përfillur këshillat e familjes. Ndër të tjera, ai shprehet se shpreson që ligji ta dënojë autorin maksimalisht dhe se ky krim makabër duhet t’i bëjë të gjithë të mobilizohen dhe të luftojnë për mirëqenien e fëmijëve në të ardhmen.
“Gjatë tërë jetës na ka sjellë probleme dhe telashe të papara, por asnjëherë nuk na ka dëgjuar dhe përfillur këshillat tona. Unë si vëlla i madh jam përkujdesur për familjen qysh në moshë shumë të re nga se herët kam mbetur pa baba, por jam munduar që “vëllanë” ta këshilloj dhe ndihmoj, por ai asnjëherë nuk ka dëgjuar askënd”, është shprehur Kastrijot Krivaqa.
Ngjarja e rëndë ndodhi dy ditë më parë, kur Dardan Krivaqa dhe Arbër Sejdiu dhunuan për vdekje 18 vjeçaren Marigona Osmani dhe e lanë jashtë dyerve të spitalit të Ferizajt. Krivaqa u arrestua ditën e sotme nga Policia e Kosovës, ndërsa Sejdiu u arrestua pak orë pasi ngjarja e rëndë kishte ndodhur.
