Gjykata e shkallës së parë Durrës ka dhënë masën e sigurisë “arrest me burg”, për Denis Dodën administratorin e kompanisë “Fish Co Tirana”, në kontenierin e së cilës u kap 7 kg kokaine.
Mësohet se 35-vjeçari Denis Doda, ka mohuar të ketë dijeni apo të jetë i implikuar në trafikun e drogës, duke hedhur kështu poshtë pretendimin e organit të akuzës.
Kujtojmë se droga u zbulua disa ditë më parë në kudër të operacionit policor “Urbanor” në Portin e Durrësit. Gjatë kontrolleve që policia ushtroi në kontenierin e ngarkuar me prodhime deti që ishte nisur nga Ekuadori
Droga është gjetur pas një kontrolli të imtësishëm të ushtruar në konteiner, në pjesën e kapakëve të ventilimit. Po ashtu në cilësinë e provës materiale policia ka sekuestruar edhe një GPS. Mësohet se lënda narkotike ishte në një kontenier të ngarkuar me prodhime deti që ishte nisur nga Ekuadori për llogari të firmës “Fish Co Tirana”, me qendër në Tiranë.
Njoftimi i policisë:
Vijojnë goditjet e njëpasnjëshme ndaj tentativës për trafikim të lëndëve narkotike në vendkalimin e kontrrollit kufitar Port, Durrës.
Finalizohet operacioni policor i koduar “Urbanor”.
Task Forca permanente e përbashkët e përbërë nga Policia Kufitare e Portit të Durrësit, Policia Kriminale e DVP Durrës dhe autoritetet doganore të Portit, evidentojnë dhe godasin një rast të tentativës së trafikimit të lëndëve narkotike.
Arrestohet në flagrancë administratori i firmës ku do mbërrinte kontenieri.
Sekuestrohet një sasi rreth 7 kg lëndë narkotike e dyshuar kokainë.
Në vijim të goditjeve të njëpasnjëshme ndaj veprimtarisë kriminale të tentativës për trafikim të drogave të forta, si rezultat i kontrolleve të shtuara, bazuar edhe në analizën e riskut të bërë nga Task Forca permanente e cila vepron në Portin e Durrësit, në bazë të dyshimeve të krijuara nga kjo Task Forcë dhe informacioneve që dispononte Policia Kriminale, kanë ushtruar kontroll të detajuar në një kontenier të ngarkuar me prodhime deti që ishte nisur nga Ekuadori për llogari të firmës “Fish Co Tirana”, me qendër në Tiranë.
Si rezultat i kontrollit të imtësishëm të ushtruar në kontenier, në pjesën e kapakëve të ventilimit u gjetën pako me lëndë narkotike të dyshuar kokainë me peshë rreth 7 kg dhe një GPS, të cilat u sekuestruan në cilësinë e provës materiale.
Në vijim të veprimeve, specialistët për Hetimin e Narkotikëve në Drejtorinë Vendore të Policisë Durrës arrestuan në flagrancë shtetasin D. D., 35 vjeç, banues në Tiranë (administratori i firmës ku do mbërrinte kontenieri).
Grupi hetimor, nën drejtimin e Prokurorisë së Rrethit Gjyqësor Durrës, vijon veprimet hetimore për dokumentimin e plotë kësaj veprimtarie kriminale, identifikimin dhe kapjen e personave të tjerë të përfshirë në të.
Materialet do t’i kalojnë Prokurorisë së Rrethit Gjyqësor Durrës për veprime të mëtejshme.
