Ministrja e shëndetësisë, Ogerta Manastirliu, ka inspektuar ditën e sotme nga afër Qendrën Shëndetësore verore në Ksamil, me shërbim 24 orë, për t’i ardhur në ndihmë pushuesve për çdo emergjencë shëndetësore.
Ministrja Manastirliu në fjalën e saj ka bërë me dije se janë 29 qendra verore në të gjithë vendin që janë në shërbim të turstëve dhe të qytetarëve.
Ndër të tjera, ministrja e Shëndetësisë bën me dije se fokusi kryesor aktualisht, është vaksinimi i qytetarëve, pasi varianti Delta ka lëkundur ndjeshëm bilancin.
“Janë 29 qendra shëndetësore verore që funksionojnë në të gjithë vendin. Vetëm në Sarandë janë tre qendra, në Borsh, Ksamil 1 dhe Ksamil 2 që ofrojnë shërbim për 24 orë, në shërbim të turistëve të huaj dhe vendas. Këto qendra shmangin flukset në spital.
Në këto qendra shëndetësore kemi vendosur që pjesë të jetë edhe testimi për Covid 19 në të gjithë struktura tona të epidemiologjisë në mënyrë që të kapen sa më shpejt rastet. Ne vijojmë me programin e vaksinimit. Jemi në muajin gusht dhe vaksinimi + 18 vjeç do të jetë në fokus të punës sonë”, ka thënë Manastirliu.
Varianti Delta ka shtuar ndjeshëm rastet në Shqipëri dhe qeveria po u kërkon qytetarëve që të vaksinohen sa më shumë të jetë e mundur gjatë këtij muaji.
