Me konfirmimin e variantit “Delta” në vendin tonë, autoritetet shëndetësore kanë shtuar thirrjet për qytetarët, që të vaksinohen sa më shpejtë në mënyrë që të frenojnë përhapjen e viruseve të reja që janë në qarkullim. Gjithashtu nga të dhënat zyrtare të vaksinuarit kundër COVID-19 në Shqipëri kanë kaluar 1 milion e 198 mijë, ndërsa rreth 24 % e popullsisë i ka marrë të dyja dozat e vaksinës.
“Është e rëndësishme që vaksinimi të përparojë me ritme të larta”, ka thënë Eugena Tomini.
Gjithashtu varianti indian i koronavirusit i quajtur “Delta”, po prek më shumë të rinjtë dhe të pavaksinuarit, ndërsa numri i të infektuarve po pëson rritje nga dita në ditë. Zëvendësministrja e Shëndetësisë Eugena Tomini i bën apel të gjithë qytetarëve që janë mbi moshën 18-vjeç, që të përfitojnë nga muaji i hapur i vaksinimit për të qenë më të mbrojtur gjatë vjeshtës.
“Nëse do jemi të vaksinuar është e rëndësishme të parandalojmë format e rënda, hospitalizimin dhe për rrjedhojë edhe vdekjen. Përgatitja për vjeshtë-dimër fillon tani”, shprehet Tomini.
Ashtu si dhe shtete të tjera dhe në vendin tonë ekspertët e shëndetësisë po vlerësojnë mundësinë për të përforcuar mbrojtjen anti-COVID me një dozë të tretë vaksine.
“Ekspertët shikojnë dhe vlerësojnë situatën jo vetëm në rajon por edhe në botë. Deri më tani nuk është gjykuar marrja e një doze të tretë”, thotë ajo.
Sjellim në vëmendje se gjatë gushtit çdo person mbi 18 vjeç mund të marrë vaksinën anti-Covid duke u paraqitur në qendrën shëndetësore vetëm më kartë identiteti.
