Mazhoranca është pro dialogut, por kurrsesi nuk pranon që të lërë pushtetin dhe të krijohet një qeveri tranzitore, ndërkohë që edhe një herë Grida Duma rithekson se ky është kusht i panegociushëm i opozitës për dialog.
Duma këtë deklaratë e ka bërë nga studio e “ABC News” ku ka thënë se këtë e sheh si domosdoshmëri për të prishur marrëdhëniet e pushtetit me krimin.
“Fakti që kërkojmë qeveri tranzitore është tregues i dialogut. Ne flasim për qëndrimin tonë. Ne dhamë modelin e se jemi të parë që do sakrifikohemi. Ne kemi thënë qeveri tranzitore dhe nuk kemi thënë zgjedhje të parakohshme. Ajo që kemi shtruar ne sot është se shkak i lidhjes mes krimit dhe pushteti është Edi Rama” tha Duma.
Njëkohësisht ish deputetja ka thënë se gjithë kritikat e marrë kanë qenë mëse të pritshme dhe kjo sepse arbitri ndërkombëtar është brenda kuadratit të vet, por shton se djegia e mandateve nuk është problemi por zgjidhja e kësaj situate.
“Unë mendoj se ndaj çdo problemi varet se si vendosesh. Në një tjetër studion unë thash se nuk është djegia e mandateve problemi por zgjidhja e kësaj situate. Djegia e mandateve duhet konsideruar një akt ekstrem mundësisht jo i dëshirueshëm. Ne do ta kthejmë situatën në përfundimin e saj, ne do bëjmë këtë që të kthejmë institucionet. Mendoj se është një vendim i arsyeshëm dhe është një tezë shumë bindëse sepse pikërisht për institucionet po diskutojmë. Ky është një moment i shënjuar jo vetëm në Shqipëri, por edhe në rajon e Ballkanit. Ky moment është një çast historik dhe kërkon shumë vëmendje të niveleve shumë të larta nga ndërkombëtarët. Arbitrin ndërkombëtar është në atë që quhet se është brenda kuadratit të vet. Unë e dija shumë mirë se ndërkombëtarët nuk do të mbështesnin në këtë lëvizje të opzitës. Ne e dimë shumë mirë se sa punë na duhet për të arritur aty ku duam ne. Ky realitet i brendshëm është më i rëndësishëm sesa politika markro e tyre”.
E teksa opozita ka thirrur me 16 mars protestën e radhës, Duma tregon ndryshimin me atë të 16 shkurtit para Kryeministrisë.
“16 Marsi nuk është njëlloj si 16 Shkurti në kronologjinë e kohës. Unë e kam thënë që ky është proces dhe do të vendoset tulla tjetër. Është një proces që nuk ndodh brenda ditësh brenda dy orësh. Se po të bëheshin gjerat brenda një muaji nuk do ishim në debate pas debati dhe politika nuk është kaq e thjeshtë”.
