Në grepin e Policisë Rrugore kanë rënë edhe kamionët. Gjatë mbrëmjes së kaluar, policia nuk ka ushtruar kontrolle në rrugët e vendit vetëm për makinat, por në “filtër” kanë kaluar edhe mjetet e tonazhit të rëndë.
Në një video të publikuar nga policia shihet se jo pak kamionë shkelin rregulluat, duke abuzuar në rrugë. Për këtë arsye, policia ka ndëshkuar me gjobë drejtuesit e 56 kamionëve.
Njoftimi i Policisë: “Vijojnë kontrollet permanente nga shërbimet e Policisë Rrugore në të gjithë vendin, për zbatimin e rregullave të qarkullimit rrugor.
Në zbatim të Udhëzimit të Përbashkët të Ministrit të Infrastrukturës dhe Energjisë dhe Ministrit të Brendshëm, nga Drejtoria e Përgjithshme e Policisë së Shtetit dhe strukturat vendore të Policisë janë planifikuar dhe janë marrë masat shtesë gjatë sezonit turistik edhe përkufizimet e qarkullimit të mjeteve të rënda për transportin rrugor të mallrave, në ditët e pushimeve javore dhe festave zyrtare.
Për këtë, Policia Rrugore ka filluar zbatimin e detyrimeve për kufizimin e lëvizjes së këtyre automjeteve duke filluar nga data 15 qershor 2021 deri në 15 shtator 2021”, shkruhej në njoftim.
Policia ditët e fundit ka qenë në lëvizje gjatë gjithë kohës dhe pas aksidenteve të shumta disa ditë më parë, aksioni i rrugores ka nisur dhe thuajse çdo ditë ka pasur penalitete të panumërta.
