Ministrja e Shëndetësisë, Ogerta Manastirliu ka qenë e ftuar në emisionin real Story në News 24, ku ka folur për situatën aktuale të Covid dhe rrezikimin nga varinati Delta. Manastirliu tha se nuk ka indikacione që varianti Delta po qarkullon në vend, ndërsa mostrat e dyshuara janë për t’u çuar në laboratorët e referencës në Londër apo Britani.
“Ajo që ju them me siguri është që ne nuk kemi indikacione që varianti DELTA po qarkullon në vend, por jemi në alert. Po vlerësojmë simptomat, përpos simptomave klasike të variantit të virusit, ka simptoma që varianti i ri i shfaq. Janë të gjithë të alertuar, nëse ka simptoma që ngjajnë me ato të variantit DELTA dhe ajo plus. Nga sinjalet e deritanishme të laboratorëve, ende nuk është kapur sinjal për variantin DELTA. Mostrat që janë të dyshuara, janë aty, për tu çuar në laboratorët e referencës. Qoftë në Londër dhe në Berlin kemi laboratorë referente, por për momentin rezulton që ky variant s’ka hyrë në Shqipëri”, tha Manastirliu.
Në lidhje me procesin e vaksinimit, ministrja tha se në vazhdim mund të uletë nën 18 vjeç mosha për marrjen e vaksinës, dhe po diskutohet edhe për një dozë të tretë. Ndër të tjera, ajo bëri me dije se po hartohet një plan për vaksinimin në shtëpi për personat që nuk kanë shkuar në qendrat shëndetësore.
“Në momentin që do të kemi një hapje të vaksinimit, do të ulen dhe moshat. Duhet thënë këtu dhe po bëj një shtojcë, në tjetër diskutim është dhe doza e tretë. Shumë vende po e vlerësojnë, s’ka një vendim të konsoliduar për këtë. Po diskutohet fillimisht që të vendosen te grupmoshat dhe shtresat e rriskuara. Dua të theksoj që për sa kohë kemi vaksinime të disponueshme dhe mirë është të vaksinohen grupmoshat e rriskuara.
Për shtresat e rriskuara, ato 60 vjeç plus, vijon procesi ndjekës për t’i vaksinuar?
Po, ne kemi ndërtuar një program përmes mjekut të familjes. Po hartojmë plan individual që për ata persona që s’kanë ardhur në qendrat shëndetësore, t’i vaksinojmë në shtëpi, përmes njësive të lëvizshme”, deklaroi Manastirliu.
