Ministri i Turizmit, Blendi Klosi, ka zhvilluar sot një takim me presidentin e Serbisë, Aleksandër Vuçiç, në kuadër të zhvillimit turistik. Klosi shprehet se ky takim ka për qëllim bashkëpunimin mes vendeve të rajonit për ndërtimin dhe konsolidimin e ofertave të përbashkëta, ndërsa shton: “Turizmi, sikundër ka nënvizuar edhe më herët kryeministri Edi Rama, është industria më lidhëse e Ballkanit Perëndimor”. Gjithashtu, në fokus ishte zhvillimi i fushatave promovuese të Shqipërisë në Serbi, duke synuar konsolidimin e bashkëpunimit rajonal në këtë fushë.
Statusi i plotë i ministrit Blendi Klosi:
“Turizmi s”ka kufi, e duhet të shfrytëzojmë çdo mundësi për të rritur e konsoliduar destinacionin turistik të Ballkanit.
Me Presidentin e Serbisë, Aleksandër Vuçiç, në pritjen e delegacionit shqiptar për të çuar përpara bashkëpunimin në fushën e turizmit, si një nga sektorët rajonal me më shumë potencial ekonomik. Bashkëpunimi mes vendeve të Rajonit, për ndërtimin dhe konsolidimin e ofertave të përbashkëta, mbetet kusht i depërtimit turistik në tregjet e largëta.
Diskutimi u përqendrua në mbështetjet e mundshme për turistët e rajonit, zhvillimin e fushatave promovuese të Shqipërisë në Serbi, nxitjen e festivaleve rinore në bregdetin tonë e të tjera tema për konsolidimin e bashkëpunimit rajonal në këtë fushë. Turizmi, sikundër ka nënvizuar edhe më herët kryeministri Edi Rama, është industria më lidhëse e Ballkanit Perëndimor”.
