Ditën e sotme në mbledhjen e Këshillit të Ministrave, ka pasur ndryshime në kabinetin qeveritar. Mësohet se është liruar nga detyra zëvendësministri i Brendshëm, Petro Koçi si dhe zv/ministri i Infrastrukturës, Etjen Xhafaj.
Vendimi për lirim nga detyra është marrë ditën e sotme në mbledhjen e Këshillit të Ministrave dhe në mungesë të kryeministrit të vendit Edi Rama, vendimet janë firmosur nga zv/kryeministri Erion Braçe. Vendimet për lirimin nga detyrat të dy zv/ministrave hynë në fuqi menjëherë. Si Xhafaj ashtu edhe Koçi në shtator hyjnë në Kuvend, pasi u zgjodhën deputetë në qarkun e Tiranës dhe Fierit.
Kujtojmë se ditën e sotme në mbledhje u firmos edhe emërimi si zëvendësministre për Evropën dhe Punët e Jashtme të Megi Finos, vajza e të ndjerit Bashkim Fino.
Vendimi për lirimin nga detyra
Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave
VENDOSI:
- Etjen Xhafaj, zëvendësministër i Infrastrukturës dhe Energjisë, lirohet nga kjo detyrë.
Ky vendim hyn në fuqi menjëherë.
KRYEMINISTRI
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
*
Vendimi për lirimin nga detyra
Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave
VENDOSI:
Z. Petro Koçi, zëvendësministër i Mbrojtjes lirohet nga kjo detyrë.
Ky vendim hyn në fuqi menjëherë.
KRYEMINISTRI
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
