Vajza ish-deputetit të ndjerë socialist, Bashkim Fino është emëruar ditën e sotme zv/ministre për Europën dhe Punët e Jashtme. Mësohet se vendimi është marrë në mbledhjen e zhvilluar këtë të mërkurë në Këshillin e Ministrave dhe në mungesë të kryeministrit të vendit Edi Rama, vendimi është firmosur nga zëvendësi i tij Erion Braçe. Kujtojmë se vajza e Bashkim Finos, Megi Fino u shfaq për herë të parë në radhët e të majtëve në kongresin e Partisë Socialiste ku edhe mbajti një fjalim që përloti të pranishmit. Gjithashtu në momentin që mori kartën e anëtarësisë në këtë parti, Megi tha se kjo kishte qenë një dëshirë e të atit.
Vendimi
Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave
V E N D O S I:
Znj. Megi Fino emërohet zëvendësministër për Evropën dhe Punët e Jashtme.
Ky vendim hyn në fuqi menjëherë.
Kujtojmë se Bashkim Fino u nda nga jeta më 29 Mars pas një betejë të gjatë me virusin e rrezikshëm COVID-19. Për rreth tre dekada, ai ka qenë politikan karriere në radhët e socialistëve. Prej vitit 1997 e në vazhdim ishte anëtar i Kryesisë së Partisë Socialiste. Kulmi i karrierës së tij do të shënohej në vitin 1997, ku do të zgjidhej Kryeministër i vendit në qeverinë e Pajtimit Kombëtar, post që do ta mbante nga muaji mars deri në korrik. Z. Fino gjithashtu ka mbajtur disa poste ministrore. Nga viti 1997 deri në 1998 ushtroi detyrën e Ministrit të Pushtetit Lokal, njëkohësisht dhe Zv/kryeministër. Në 1999 deri në vitin 2001 do të ishte ministër i pushtetit lokal. Gjatë viteve 2001-2002 ka qenë Ministër i Punëve Publike dhe Turizmit.
