Kreu i Partisë Demokratike, Lulzim Basha, ka reaguar pas deklaratave të kryeministrit Edi Rama në një konferencë për shtyp pë Policinë e Shtetit, si dhe incidentin mes kryebashkiakut të Lezhës, Pjerin Ndreu, dhe tri efektivëve të Policisë.
Basha shkruan në rrjetin social “Twitter” se punonjësit e ndershëm të Policisë, janë të tradhtuar nga regjimi Rama-Doshi, ndaj sipas tij, fajtori ishte sot pa përgjigje. “Punonjësit e ndershëm të Policisë janë të tradhtuar nga regjimi Rama-Doshi”, shkroi fillimisht Basha.
“Kur vjen në pushtet me krimin, Policia përdoret si vegël për të mbrojtur lidhjet e pushtetit me krimin. Pasojat e këtij modeli që sundon vendin, i vuajnë qytetarët, fëmijët dhe familjet shqiptare. Zgjidhja është prerja e lidhjeve të pushtetit me krimin. Prandaj, fajtori ishte sot pa përgjigje. Peshku qelbet nga koka!”, theksoi kreu i PD-së në “Twitter”.
Por çfarë tha Rama për Policinë e Shtetit në konferencë për shtyp? Kryeministri u shpreh: “Nuk ka krizë në Policinë e Shtetit. Bazuar në fakte, kontekst dhe trende. Puna nuk hidhet dot poshtë se ndodhën disa ngjarje tragjike.
Çfarë mund të bëjë Policia mes dy fqinjëve që futen në sherr? Dini të ma thoni. Në cilin vend të botës…Armëmbajtja pa leje, nga pikëpamja legjislative kemi më të rëndin. Nga puna e Policisë, kemi një punë që e tregojnë faktet”, tha mes të tjerash Rama.
