Belgjikës i duhet fuqia e Romelu Lukakut, për të kaluar fazën. “Djajtë e kuq”, pas fitores 3-0 në debutim kundër Rusisë, dëshirojnë të fitojnë sa më shpejt biletën për fazën e ardhshme të “Euro 2020”.
Në ndeshjen e fundit do të përballet ndaj Finlandës, që në debutim mposhti 1-0 Danimarkën në sfidën që u mbush me frikë të madhe për incidentin e Eriksenit. Sfida luhet sot, me start në orën 21:00. Në ndeshjen e dytë, Belgjika mposhti 2-1 edhe Danimarkën duke hipotekuar kualifikimin në 1/8-at e kompeticionit.
Për ndeshjen e tretë të fazës së grupeve të Europianit, Rusia do të përballet me Danimarkën në stadiumin “Telia Parken” të Kopenhagenit me vërshëllimën e startit në orën 21:00.
Danimarka, e tronditur nga ngjarja me Eriksenin, vjen nga humbja kundër Finlandës në debutim dhe më pas nga disfata e pësuar kundër Belgjikës së Lukakut. Rusia, ashtu si danezët, duhet gjithashtu të kërkojë pikë, pasi u mposht 3-0 nga formacioni belg.
Do të jetë ajo e sotmja, një ndeshje vendimtare, në një kuptim apo tjetrin, për të dyja formacionet. Përpara startit kanë folur të dy trajnerët. “Do të bëjmë gjithçka për të fituar, – u shpreh Kasper Hjulmand, tekniku i Danimarkës. – Kundër Rusisë do të jetë tepër e vështirë, janë një skuadër e shkëlqyer. Prisni një ndeshje të bukur dhe të gjatë”. Stanislav Çerçeshov, trajneri rus, tha: “Luajmë ndeshjen e parë pa tifozët tanë, megjithatë nuk është problem. Është një situatë që do të dimë si ta menaxhojmë. Detyra jonë është të arrijmë rezultat”.
