Detaje të reja janë bërë të ditura në sekuestrimi i 300 kg kokainë në portin e Durërsit ditën e sotme.
Mësohet se droga është gjetur në një kamion transit që vinte nga Maqedonia e Veriut dhe destinacion kishte Italinë. Gjithahstu është bërë i ditur edhe identiteti i shoferit që drejtonte kamionin, tashmë i arrestuar. Ai është Nazif Ajroski, 40 vjeç, banues në Maqedoninë e Veriut dhe kishte hyrë në vendin tonë nga dogana e Qafë-Thanës e nesër do të nisej drejt Italisë.
Gjatë kontrollit të dytë të mjetit u vu re diçka e dyshimtë gjë që çoi në një kontroll të imtësishëm. Pas shkarkimit të mallit, ngarkesë hekuri me destinacion Italinë, u gjetën edhe 40 pakot në trupin e mjetit. Ato ishin të ambalazhuara me logot e firmave të ndryshme të modës si “Dior” apo “Louis Vuitton” apo ekipeve sportive që nga Chicago Bulls e deri tek Paris Saint German.
Nga peshimi i pakove mendohet se sasia e kokainës së gjetur arrin deri në 300 kg.
Nga ana tjetër shoferi i arerstuar është shprehur se ai është thjesht një punëtor dhe nuk ishte në dijeni të drogës. Ai pritet të merret në pyetje në praninë e një përkthyesi të certifikuar pasi nuk flet shqip.
