Drejtori i IKMT-së në Shkodër, Ilir Niklekaj ka dhënë dorëheqjen. Mësohet se në vend të tij është emëruar Serdar Hoxha. Arsyet se përse Niklekaj ka dhënë dorëheqjen ende nuk janë bërë të ditura, ndërsa në ditët e fundit në Drejtorinë rajonale të Shkodrës ka pasur ndryshime.
Ilir Niklekaj është emër i njohur për drejtësinë, pasi në vitin 2016, u arrestua për tjetërsimin e 15 hektarëve tokë në Velipojë teksa kryente funksionin e drejtorit të Hipotekës. Kujtojmë se deri tani janë ndryshuar drejtuesit e Tatim Taksave, Drejtorisë së Transportit Rrugor dhe Zyrës Vendore të Arsimit.
Në krye të Inspektoriatit të Territorit në Shkodër është emëruar ditën e sotme Serdar Hoxha. I emëruari në krye të IKMT-së, Serdar Hoxha ka qenë kandidat për deputet i partisë së Tom Doshit në zgjedhjet e 25 prillit.
Edhe pse nuk arriti të fitonte mandatin, 25-vjeçari Serdar Hoxha ia ka dalë të fitojë një pozicion pune, në të cilin rrallë shohim bashkëmoshatarë të tij. Serdar Hoxha në Shkodër njihet mjaft mirë si një ndër “sekserët” kryesorë të Tom Doshit. Ka qënë gjatë gjithë kohës i angazhuar në fushatën e Tom Doshit në zgjedhjet e shkuara dhe duket se është shpërblyer.
Tom Doshi, kryetari i Partisë Socialdemokrate, dha dorëheqjen e parevokueshme nga gara për deputet duke i lënë vendin kandidatëve të tjerë në partinë që ai drejton, e cila siguroi 3 mandate në zgjedhjet e 25 prillit.
