Kryetari i Bashkisë së Vlorës, Dritan Leli ditën e sotme është thirrur në një ballafaqim publik nga anëtarët e këshillit bashkiak. Përballja do të zhvillohet ditën e sotme në teatrin “Petro Marko dhe pritet të nisi në orën 10:00, por vendimi nuk është pritur mirë nga Dritan Leli, kreu i Bashkisë Vlorë. Leli ka kërkuar që mbledhja të zhvillohet online, sepse sipas tij, nëse në ambient do të jenë të pranishëm 60 persona, mbledhja do të jetë në shkelje me rregullat anti-COVID të vendosura nga Komiteti Teknik i Ekspertëve. Në letër, Leli shkruan mes të tjerash se “Me veprimet e mësipërme, ju si organizatorë të kësaj mbledhje, jeni duke shkelur ligjin 15/2016 “Për parandalimin dhe luftimin e infeksioneve dhe sëmundjeve infektive”, ku jemi të detyruar të sjellim në vëmendjen tuaj se bazuar në nenin 3 pika 2 të aktit normativ nr.3/2020, subjektet apo individët që organizojnë ndër të tjera dëgjesa publike dënohen me gjobë në masën 5.000.000 lekë”.
Leli nëpërmjet një letre drejtuar Kryetares së Këshillit,ka theksuar se pas diskutimeve dhe shkresave mes tij dhe këshillit bashkiak, është vendosur që mbledhja të bëhet përmes platformës zoom.
LETRA:
Lidhur me mbledhjen e ditës së sotshme kërkuar nga një grup këshilltarësh bashkiak, më poshtë do të gjeni të gjithë komunikimin zyrtar që kam zhvilluar me Këshillin Bashkiak, për mbledhjen e kërkuar prej tyre për t’u zhvilluar në teatrin Petro Marko. Referuar ligjit për parandalimin dhe luftimin e infeksioneve, kemi vendosur që mbledhja të zhvillohet online, në aplikacionin Zoom, siç janë zhvilluar të gjitha mbledhjet e deritanishme përgjatë gjithë vitit.
