Ministrja e Shëndetësisë dhe Mbrojtjes Sociale, Ogerta Manastirliu, në fjalën që mbajti ditën e sotme në Kongresin e Jashtëzakonshëm të Partisë Socialiste, ka deklaruar se pandemia e testoi qeverinë, por nuk arriti që ta gjunjëzonte vendin tonë. Gjithashtu Manstirliu ka theksuar se Shqipëria është përkrahë Islandës, si një vend, që ka më pak infektime nga Covid në Europë.Ajo ka vazhduar më tej duke thënë se Partia Socialiste do ta ngrejë Shqipërinë dhe se ka ardhur momenti sipas saj i autonomisë spitalore. Manstirliu ka thënë se do të krijojnë polet spitalore në katër rajone të vendit.
“Pandemia na testoi, por nuk na gjunjëzoi. Iu përgjigjem me solidaritetin e mrekullueshëm të qytetarëve të vendit. Jemi përkrah Islandës si ndër vendet me më pak raste nga Covid në Europë. Kemi fituar disa beteja, por lufta nuk ka mbaruar. Ne do ta ngremë Shqipërinë, si dhe në çdo kohë do ofrojë shërbim shëndetësor për çdo qytetar.
Ka ardhur momenti i autonomisë spitalore, do krijojmë polet spitalore në katër rajone të vendit. Ne jemi të vetëdijshëm se rruga që kemi përpara është edhe më e vështirë nga ajo që kemi kaluar”, u shpreh Manastirliu.
Kujtojmë se ditën e sotme u mbajt Kongresi i Jashtëzakonshëm i Partisë Socialiste, i cili përkoi edhe me 30 vjetorin e kësaj partie. Ashtu si u paralajmërua edhe më parë nga vetë socialistët ky Kongres pati surpriza, ku ai që bëri më shumë bujë ishte dorëheqj e kryeparlamentarit Gramoz Ruçi, por edhe prezenca me video-mesazh i ish liderit legjendar të PS-së, Fatos Nano.
