Ka nisur Kongresi i Jashtëzakonshëm i Partisë Socialiste në stadiumin “Air Albania”, i cili mbahet në 30-vjetorin e themelimit të kësaj partie. Kongresi u hap me himnin kombëtar, për të vazhduar më pas me dokumentarin e rrugëtimit të kësaj partie nga viti ’91 e deri në ditët e sotme. Në këtë Kongres pritet që të prezantohet vizioni “Shqipëria 2030”, po ashtu edhe platforma për qeverisjen në katër vitet e ardhshme nga Partia Socialiste e cila doli fituese në zgjedhjet parlamentare të mbajtura më 25 prill.
Më herët për këtë kongres janë paralajmëruar surpriza, mesazhe nga kontribues dhe socialistë të vjetër por dhe miratimin e disa vendimeve të Asamblesë Kombëtare të PS. Në axhendën e punimeve është edhe një analizë për zgjedhjet e 25 Prillit duke vënë theksin te strukturat që nuk kanë funksionuar edhe pse u arrit qëllimi për marrjen e mandatit të tretë. Një tjetër pikë do të jetë rizgjedhja e strukturave dhe anëtarësimet e reja.
AXHENDA E KONGRESIT TË PS
- Hapja e Kongresit (Himni Kombëtar);
- Rrugëtimi i Partisë Socialiste prej 12 Qershorit 1991;
- Vizioni për Shqipërinë 2030 dhe Programi Qeverisës në Mandatin e Ri.
4. Miratimi i Vendimeve të Asamblesë Kombëtare të Partisë:
a. Vendim “Për ngritjen dhe funksionimin e Komisionit të Posaçëm të Analizës për Zgjedhjet e Përgjithshme të 25 Prill 2021”;
b. Vendim “Për zhvillimin e analizave për rezultatin e zgjedhjeve të përgjithshme të 25 Prillit 2021”;
c. Vendim “Për zgjedhjet e reja në strukturat vendore të partisë”;
d. Vendim “Për zhvillimin e fushatës së anëtarësimeve të reja në parti”;
e. Vendim “Për përfundimin e procesit të ngritjes dhe funksionimit të Regjistrit Digjital të Partisë”;
f. Vendim “Për miratimin e Kalendarit Politiko-Organizativ të Partisë për periudhën Qershor-Dhjetor 2021”.
