Një vendim i papritur nga Bashkia e Tiranës do të rrisë kostot e transportit publik për qytetarët gjatë tre muajve në vazhdim. Prej qershorit e deri në gusht, qytetarët nuk do të kenë në dispozicion abone të përgjithshme që kushton 1600 lekë të reja, për të përdorur linjat urbane në kryeqytet. Vendimi pritet të miratohet të hënën në Këshillin Bashkiak.
Arsyeja është se nga 1 qershori bashkia do të riorganizojë itineraret, frekuencat e lëvizjes dhe kushtet e shërbimit të transportit publik, por për këtë duhet të studiohen paraprakisht volumet e udhëtimit.
Sipas operatorëve, volumi i udhëtarëve është në nivele minimale dhe për këtë ka ndikuar pandemia. Për të arritur në konkluzione më të qarta, sipas relacionit, do duhet që aboneja e përgjithshme të hiqet.
“Shërbimi publik eci me hapa të ngadaltë duke rritur pak nga pak kapacitetet transportuese dhe frekuencat e lëvizjes.
Kjo rritje e kapaciteteve lëvizëse në transportin publik arriti deri në 60 % të niveleve të parapandemisë dhe nuk arrin edhe sot të ngrihet më shumë, pasi volumi i udhëtarëve të transportit publik ra në vlera paralele me mjetet e transportit publik në operim gjatë kësaj periudhe.
Me qëllim përshtatjen e strukturës së udhëtimit me volumet e reja të udhëtimit si dhe vendimet që do të lidhen me itineraret e linjave; frekuencat; kushtet e shërbimit; gjatë periudhës së kryerjes së plotë të shërbimit, lind nevoja e heqjes së biletës së përdorimit mujor të përgjithshme (abone e përgjithshme), për një periudhë tremujore, pasi kjo periudhë do të shërbejë që nëpërmjet vijimit të matjeve në terren, të studiohet dhe analizohet situata me të gjithë impaktet, me qëllim ristrukturimin e linjave në itinerare, frekuenca, kushte shërbimi si dhe rishpërndarjen e volumeve të udhëtarëve”, citohet në projektvendim, i cili iu propozon 61 anëtarëve të këshillit miratimin e tij, si një shtesë në vendimin nr. 66, datë 30.12.2015, “Për indeksimin e tarifave të transportit qytetas në Bashkinë e Tiranës”.
Ndërkohë, një biletë autobusi në transportin publik në Tiranë kushton 40 lekë të reja. Ata që e përdorin autobusin për të shkuar apo për t’u kthyer nga puna, duhet të shpenzojnë minimalisht 80 lekë. Kjo pa marrë parasysh nëse duhet ndërruar linja dhe të përdoren më shumë se dy autobusë. Pra, nëse me një abone duhet të paguante 1600 lekë të reja në muaj, tashmë 1 qytetar që e përdor të paktën dy herë në ditë transportin publik, llogaritur në 22 ditë punë në muaj, duhet të paguajë minimalisht 1760 lekë në muaj.
