Një vrasje me armë zjarri tronditi Vlorën mbrëmjen e sotme, ku mbeti viktimë 38-vjeçari Delon Troqe. Ngjarja ndodhi në lagjen “Pavarësia”, ndërsa 38-vjeçari ndërroi jetë në spital si pasojë e plagëve të marra.
Mësohet se ai kishte disa ditë që ishte kthyer nga Spanja, ndërsa mbërjen e sotme u ekzekutua pranë servisit të tij. Ai ka qenë i dënuar më parë, pasi mëohet se ka bërë disa vite burg në një moshë më të re. Troqe ishte i martuar dhe kishte një fëmijë, ndërsa kishte hapur një servis skafesh.
Por mbiemri i tij lidhet me një ngjarje tjetër të rëndë. Ai ishte kushëri I Elvis Troqes, i cili është zhdukur pa gjurmë që prej vitit 2018. Në 17 korrik të 2018-ës Troqe u zhduk pasi hipi në një automjet tip “Merceds Benz” dhe prej atëherë nuk dihet asgjë për të.
Ndërkohë, lidhur me ngjarjen e sotme, policia ka gjetur një makinë të djegur që dyshohet se i përket autorëve të vrasjes. Ende nuk dihet arsyeja se përse Delon Troqe mund të jetë ekzekutuar, por kjo është vrasja e dytë që trondit Vlorën në dy javë. Bledar Birçaj u vra jo më larg se dy javë më parë me breshëri plumbash, teksa ishte duke lëvizur me automjetin e tij.
