Kanë mbërritur në Kosovë 3510 dozat e radhës të vaksinës Pfizer që janë pjesë e asistencës së Bashkimit Europian. Lajmin e ka konfirmuar Ministria e Shëndetësisë.
“Divizioni i Komunikimit me Publikun MSh ju konfirmon se MSh ka pranuar mbrëmë kontingjentin e radhës prej 3,510 vaksinave te Pfizer, pjesë e asistencës së BE për Kosovën në sigurimin e vaksinave kundër Covid-19”, thuhet në njoftimin e Ministrisë së Shëndetësisë.
Më herët Kosova ka marrë 4680 doza të Pfizer dhuratë nga Bashkimi Europian, nga 95 mijë doza që janë planifikuar të mbërrijnë në vend. Tashmë Kosova ka nisur fazën e dytë të vaksinimit të popullsisë ku bëjnë pjesë personat e moshës 65-79 vjeç. Në fazën e parë që ka nisur në fund të marsit, përparësi u është dhënë punonjësve shëndetësorë dhe personave mbi 80 vjeç. Ndërkohë, faza e tretë konsiston në vaksinimin e 50% të popullsisë.
Vaskinimi në Kosovë ka nisur në muajin mars me vaksinat e AsrtaZeneca që u dhuruan nga program COVAX i OBSH. Ministria e Shëndetësisë ka bërë më dije se deri tani janë vaskinuar 46.097 mbi moshën 65-vjeçare. Doza të tjera vaksinash pritet që të vijnë në vazhdim, ndërsa Kosova nuk ka nënshkruar ende një kontratë për blerjen e tyre nga ndonjë kompani farmaceutike, por ka përfituar vetëm nga programet e OBSH dhe BE.
