Shqipëria ka arritur të përmbushë shifrën e 600 mijë vaksinimeve ndaj Covid-19. Lajmin e ka bërë të ditur kryeministri Edi Rama me anë të një postimi në rrjetet sociale ku njoftohet se është arritur objektivi.
Vaksinimi në Shqipëri ka nisur që prej muajit janar, me vaksinat Pfizer që Shqipërisë iu bënë dhuratë nga një vend europian. Më pas në vendin tonë kanë ardhur edhe vaksina nga Astrazeneca, ndërsa në muajin mars qeveria i hapi rrugën vaksinave ruse të Sputnik V e po ashtu vaksinave kineze të Sinovac. Këto të fundit janë vaksinat që janë përdorur më së shumti në vendin tonë pasi kanë ardhur në një sasi prej 500 mijë dozash që ishin parashikuar në kontratë.
Procesi i vaksinimit ka nisur fillimisht me bluzat e bardha dhe stafin mjekësor për të vazhduar me të moshuarit, mësues dhe pedagogë, policët, gazetarët e terrenit etj. Aktualisht mosha për vaksinimin është ulur në +60.
Shifrat e pandemisë javët e fundit kanë pësuar një rënie të ndjeshme, ndërsa gjatë 24 orëve të fundit janë regjistruar 57 raste të infektimeve me koronavirus. Ndërkohë, një person ka humbur jetën. Që prej fillimit të pandemisë në vendin tonë janë regjistruar 131,723 raste pozitive, nga 658,828 testime të kryera në total. Kanë humbur betejën me virusin 2,412 qytetarët, ndërsa janë shëruar 117,089 të tjerë.
