Presidenca i ka kthyer përgjigje nismës së marrë nga maxhoranca për shkarkimin e Presidentit të republikës, Ilir Meta dy ditë më parë. Me anë të një dokumenti zyrtar, Presidenca pretendon se në dokumentin e firmosur nga deputetët nuk jepet asnjë sqarim lidhur me arsyet se pse dërgohet. Pavarësisht kësaj Presidenti është shprehur i gatshëm që të paraqitet në Komisionin e Ligjeve më datë 10 Maj. Meta ka kërkuar gjithashtu më parë zbardhjen e disa ngjarjeve të cilat kanë lidhje me fushatën elektorale, duke përmendur disa raste konkrete si plagosja në Kavajë, vrasja që ndodhi në qytetin e Elbasanit dhe përplasjen më 14 mars, po në të njëjtin qytet.
“Pra, kush e nxiti krimin? Kush i mbrojti personat me precedentë penalë? Përse nuk u hetuan dhe ndaluan në kohë? Nga këtu duhet ta nisi Kuvendi! Këtyre pyetjeve duhet t`i japë përgjigje Kuvendi! A ishin personat me precedentë penalë që shoqëruan Kryeministrin në Ditën e Verës dhe që ushtruan dhunë ndaj mbështetësve të opozitës në 14 mars, të njëjtë me personat që u kallëzuan nga Partia Demokratike në SPAK në datë 7 prill, dhe po të njëjtët ata që u përfshinë dhe nxitën konfliktin në ngjarjen e Elbasanit të datës 21 prill?!Ndërkohë që në ngjarjen e 21 prillit 2021, ishin të pranishëm drejtues të Policisë së Shtetit dhe efektivë të saj, pse Policia e Shtetit nuk ndërhyri, por u lejua largimi i personave të përfshirë nga vendi i krimit? Përse organet ligjzbatuese (Policia dhe Prokuroria) dhanë dy versione të ndryshme për ngjarjen? Kjo çështje patjetër që duhet zbardhur!,”-shkruhet ndër të tjera në përgjigjen zyrtare.
Kujtojmë se kjo është hera e dytë që Partia Socialiste kërkon që të shkarkojë Presidentin Ilir Meta, me pretendimin se ka ndërhyrë në zgjedhje. Herën e parë gjithçka nisi pasi Meta nuk pranoi të dekretonte ministrin Gent Cakaj si Ministër për Europën dhe Punët e Jashtme, si dhe Sandër Lleshajn për postin e Ministrisë së Brendshme. Kulmi arriti kur Presidenti nuk pranoi të dekretonte 30 qershorin si datën e zgjedhjeve.
