Presidenca i përgjigjet kreut të Grupit Parlamentar të Partisë Socialiste, Taulant Balla, i cili sulmoi sot nga foltorja e Kuvendit , Presidentin e vendit , teksa tha se nisma për shkarkimin e tij nuk është një tentativë për të kapur institucionet e Kreut të Shtetit. Balla ka thënë se kjo po bëhet për të gjetur një President mbi palët për rrugën evropiane të Shqipërisë.
I menjëhershëm ka qenë reagimi i Presidencës. Zëdhënësi i Presidentit, Tedi Blushi me anë të një postimi në rrjetet sociale i është përgjigjur numrit dy të Partisë Socialiste.
Blushi ka shkruar se vëmendja ndaj Parlamentit me zero opozitë është zero, ndërsa ka bërë thirrje që të hapen kutitë e zgjedhjeve të 25 prillit. Ai ka ritheksuar edhe një herë që të bëhet rinumërimi i votave me transparencë sipas Kodit Zgjedhor, gjithashtu që çdo shkelje dhe manipulim të evidentohet me qetësi deri në fund të procesit.
“Zero vëmendje ndaj Parlamentit me Zero opozitë. Ndryshimi është brenda në kuti. Hapni kutitë! Numëroni dhe rinumëroni me transparencë çdo votë sipas Kodit Zgjedhor. Çdo shkelje dhe manipulim të evidentohet me qetësi deri në fund të procesit! Shqiptarëve nuk mund t’ju grabitet kurrsesi vota dhe vullneti i shprehur përmes saj. 🇦🇱”, shkruan Blushi.
Kujtojmë se ditën e djeshme 50 deputetë të Partisë Socialiste, në një letër drejtuar Kreut të Kuvendit, Gramoz Ruçit, kërkonin shkarkimin e Presidentit të republikës Ilir Meta.
