Bashkimi Europian i ka dhuruar Shqipërisë pajisje mjekësore të specializuara për parandalimin dhe trajtimin e koronavirusit që arrijnë një shumë totale prej 4.2 milionë eurosh.
“Pajisje mjekësore të specializuara për parandalimin dhe trajtimin e Covid19 me një shumë totale prej 4.2 milionë Euro i janë dhuruar Shqipërisë që nga fillimi i pandemisë” thuhet në postimin e delegacionit të BE-së në Facebook.
Pajisjet përfshijnë autoambulanca, defribilatorë, teste të shpejta për Covid, dezinfektues, maska.
Bashkimi Europian ka mbështetur Shqipërinë po ashtu me vaksinat anti Covid. Gjatë kësaj jave në Shqipëri do të vijnë 11 700 doza të vaksinës Pfizer nga kontrata që Shqipëria ka me Bashkimin Europian. Lajmin e ka bërë të ditur më herët kryeministri Edi Rama. Po ashtu përgjatë muajit maj pritet të vijnë rreth 99 mijë vaksina të tjera nga kontratat meCovax, me Pfizer dhe gjithashtu me instrumentin e krijuar tashmë nga Bashkimi Europian.
Ndërkohë, prej fillimit të pandemisë në vendin tonë janë shënuar në total 131,276
raste infekimesh me koronavirus. Aktualisht janë aktive 17,085 raste. Deri tani kanë humbur betejën me virusin 2,399 persona, ndërsa janë shëruar 111,792
pacientë.
Prej muajit janar të këtij viti në Shqipëri ka filluar edhe procesi i vaksinimit, fillimisht me vaksinën Pfizer e më pas me mbërritjen e vaksinave të tjera nga AstraZeneca e më vonë Sputnik V dhe Sinovac. Ditën e djeshme u përmbush edhe objektivi i 500 mijë vaksinimeve.
