Thiago Silva ishte vetëm 21 vjeç, kur, si një lojtar i ri premtues te Dinamo Moska, zbuloi se ai ishte sëmurur me tuberkuloz. Ishte viti 2005 dhe karriera e mbrojtësit brazilian ishte gati të merrte hov por një e papritur e detyroi atë të rrinte i ‘qetë’ për një vit.
Tuberkulozi ishte në një gjendje kaq të përparuar, saqë mjekët madje menduan të hiqnin një pjesë të mushkërive të tij për të siguruar mbijetesën e tij. Por nëna e tij, Angela dhe gruaja e tij, Isabelle, e bindën mbrojtësin që të refuzonte, pasi një operacion i tillë do të thoshte lamtumirë paraprakisht në karrierën e tij të futbollit.
Thiago Silva, para se të transportohej në spital, kishte pësuar disa simptoma, të tilla si ethe të larta, sulme të kollitjes dhe djersitje të rëndë. Padyshim që nuk ishte një rast gripi, ai u dërgua me urgjencë në klinikë ku mjekët zhvilluan një seri testesh për të përcaktuar se çfarë kishte ndodhur. Mjekët e Dinamos së Moskës ishin gjithashtu të befasuar që braziliani i ri u lodh kaq shpejt. Ata u shtangën kur mësuan se ai vuante nga tuberkulozi, dhe madje ishte prekur nga sëmundja gjashtë muaj para zbulimit të tyre.
Mjekët i kishin thënë se nëse do të qëndronte edhe dy javë në atë gjendje, do të kishte ndërruar jetë. Një mrekulli e vërtetë për Thiago Silvan, i cili ka bërë një karrierë mbresëlënëse dhe në moshën 36 vjeç mbetet një nga lojtarët më të mirë në rolin e tij.
