Kryeministri Edi Rama ka vazhduar fushatën elektorale në Elbasan, ku ka zhvilluar edhe një takim me gratë e këtij qyteti. Rama ka sulmuar opozitën gjatë fjalës së tij, ndërsa ka thënë se ata duan të rikthehen dhe të ofrojnë të njëjtat gjëra. Madje sipas Ramës, ata po kërkojnë votën duke ofruar në këmbim para. Kryeministrit i duket e pabesueshme se ka akoma njerëz që i besojnë PD-së. Ai tha se PS ka realizuar vaksinimin masiv dhe prandaj këmbënugulin që ta çojnë deri në fund detyrën.
“Disa herë shqiptarët kanë bërë një zgjedhje që i ka çuar drejt greminës, duke u tërhequr prej hunde nga përgjegjës të papërgjegjshëm. Kanë zgjedhur të shkojnë pas Haxhi Qamilit dhe të shihen më pas të rrethuar nga flakët e zgjedhjes së gabuar. Kanë zgjedhur të shkojnë pas Sudes e Xhaferrit. Me idenë se nuk ka nevojë të lodhesh, mjafton të japësh një e të marrësh dy. Ata që duan të rikthehen po i ofrojnë të njëjtën recetë; Na jepni votën se do të japim kaq mijë euro këtu, e kaq atje. Si mund të jetë kështu? Si mund të ndodhi kështu? Si mund të ketë njerëz që të besojnë akoma në këto lloj çudish? I kanë paguar shumë shtrenjtë në të shkuarën. Zgjedhja për ne, dhe ajo me ne është e qartë, të punojmë me këmbëngulje pa rënë pre e lodhjes dhe e mërzisë. E rezistencës së kundërt që i vjen çdokujt. Jemi në kushtet kur çdokujt vaksinimi masiv i duket gjë e zakonshme. Ne jemi ata që realizuam vaksinimin masiv si askush tjetër. E kemi për detyrë prandaj nuk flejmë, këmbëngulim për t’ja dalë për të bërë detyrën siç duhet,”-tha Rama.
