Presidenti i Shqipërisë, Ilir Meta, ka dalë në mbështetje të banorëve të Zall Gjocajt, të cilët protestuan kundër ndërtimit të një HEC-i në zonën e tyre. Përmes një reagimi në rrjetin social “Facebook”, kreu i shtetit bëri thirrje që kjo masakër ekologjike, të ndalet menjëherë. Mes të tjerash, Meta i ka bërë thirrje Prokurorisë që të hetojë abuzimet flagrante.
REAGIMI I METES:
“Mbështes plotësisht protestën e banorëve të Zall Gjocajt në mbrojtje të pasurive të çmuara natyrore të Parkut Kombëtar Lurë – Mali i Dejës dhe të burimeve ujore jetësore për këtë komunitet. Të ndalet menjëherë kjo masakër ekologjike!
I bëj thirrje Prokurorisë të hetojë abuzimet flagrante në dhënien e lejeve të shfrytëzimit të këtyre pasurive kombëtare me vlera të jashtëzakonshme, në shkelje kriminale të ekuilibrave ekologjike dhe interesave të komunitetit. Përgjegjësit duhet të dalin pa vonesë para ligjit! 25 Prilli, është referendum edhe për ndalimin e krimit mjedisor”, shkroi Meta.
https://www.facebook.com/ilirmetazyrtar/posts/3928486470530930
PROTESTA
Ndërtimi i një hidrocentrali dhe një fabrikë uji në fshatin Thirr të Mirditës nxori në protestë banorët e zonës të cilët akuzojnë për vjedhje të pasurisë së përbashkët. Ata shprehen se kompania private e ndihmuar nga pushtetarët lokal ka shkelur ligjin duke shmangur konsultimin me qytetarët dhe pëlqimin e tyre gjë e cila nuk ka ndodhur. Në mbështetje të banorëve erdhën dhe deputetë të Lëvizjes Vetëvendosje nga Kosova të cilët ujin e konsideruan si pronë të përbashkët të këtyre banorëve.
