Shqipëria humbi përfundimisht gjyqin ndërkombëtar me Francesco Becchettin dhe shuma që duhet t’i paguajmë sipërmarrësit italian 110 milionë euro. Ndërsa një detyrim i tillë është i pashmangshëm, Edi Rama dhe Erion Veliaj ende nuk e besojnë se e kanë humbur gjyqin dhe vazhdojnë deklarata denigruese ndaj ish-pronarit të Agon Channel.
Sipas Veliajt, Partia Socialiste nuk ka asnjë përgjegjësi për humbjen e gjyqit dhe borxhin që u ka hedhur mbi supe shqiptarëve. Për Veliajn, Becchetti është mjeshtër i spekulimit dhe procesi ende nuk ka mbaruar.
“Becchetti është mjeshtër i spekulimit. Partia Socialiste s’ka asnjë përgjegjësi. Nuk ka mbaruar procesi. Beccheti ka dashur të “sjelli plehra” në Shqipëri. Sa herë që ka një fatkeqësi, humbet shteti shqiptar, e kap Shqipërinë pandemia ose një tërmet, ka një pjesë e politikës që bëhet me tërmetin, Becchettin dhe pandeminë”, deklaroi kryebashkiaku në “Opinion”.
Po të njëjtën linjë ka mbajtur edhe më parë Rama sipas të cilit Shqipëria kishte fituar 3 nga 4 beteja me Beçhettin, i cili është një “marifetçi”.
“Shqipëria ka fituar tre nga katër gjyqet ndërkombëtare ndaj këtij marifetçiu dhe beteja vazhdon!
Gëzimi sharlatanesk i Presidentit mendjehumbur dhe i partisë që për pushtet po infekton përditë shqiptarët, do të zgjasë pak dhe ata do të humbasin, jo Shqipëria! E cila siç po fiton mbi Armikun e Padukshëm, do të fitojë edhe mbi Marifetçiun e Paskrupullt!
Gëzimi i Ilir Metës dhe i Lulepartisë për vendimin e padrejtë të arbitrazhit në favor të një individi që kërkohet nga drejtësia shqiptare është sa i neveritshëm, aq dhe i parakohshëm!”, shkruante Rama fillpas humbjes së gjyqit.
Në fakt kjo është linja që Rama ka mbajtur që para vendimit të gjykatës ndërkombëtare, e cila dukshëm nuk i dha të drejtë. Rama e quajti italianin mashtrues, marifetçi e shumë epitete të tjera para se organet kompetente të drejtësisë të shpreheshin. Rama dhe Veliaj e mbyllën televizionin Agon Channel, para se drejtësia të shprehej në lidhje çështjet që biznesmeni kishte të hapura. Dhe ky delir i Ramës, sot po i kushton shqiptarëve 110 milionë euro.Nëse Partia Socialiste nuk ka asnjë përgjegjësi për rastin, pse Veliaj i dërgonte letër Becchettit ku i shkruante se po e detyronte të ishte armiku i tij.
“Veliaj më kishte shkruar: Unë nuk e kuptoj pse po ma bën këtë. Ju po më detyroni të jem armiku juaj! E gjithë qeveria do të jetë armiku juaj pa asnjë arsye,” shprehej Becchetti në një artikull të The Independent të vitit 2019. Kjo letër vinte pasi Agon Channel kishte bërë publike detaje të dasmës luksoze të Veliajt në Kalanë e Gjirokastrës.
A mban përgjegjësi Veliaj për këto deklarata të tij? Po Partia Socialiste për mbylljen e Agon Channel? Në vendimin e gjykatës thuhej qartë se mbyllja e televizionit ishte e motivuar politikisht, përgjegëjsi që bie mbi PS si partia që ka qenë në pushtet kur Agon Channel u mbyll me vendim të qeverisë.
