Policia e Tiranës ka arrestuar dy persona, të cilët dy ditë më parë plagosën me thikë një 32-vjeçar. Ngjarja ndodhi në datën 4 prill, në afërsi të një lokali te Stacioni i Trenit në Tiranë, ndërsa dy ditë më vonë, blutë e kryeqytetit bënë arrestimin e autorëve të dyshuar, të cilët ishin shpallur në kërkim.
“Specialistët për Hetimin e Krimit në Komisariatin e Policisë Nr.3 bënë ndalimin e shtetasve G. B., 49 vjeç dhe S. B., 22 vjeç, të shpallur në kërkim për veprën penale “Vrasje me dashje” e kryer në bashkëpunim, e mbetur në tentativë, sepse me datë 04.04.2021, në bashkëpunim me njëri-tjetrin kanë goditur me thikë shtetasin E. K., 32 vjeç, i cili ndodhet në spital, nën kujdesin e mjekëve”, thuhet në njoftimin e Policisë së Shtetit.
NJOFTIMI I POLICISE I DATES 4 PRILL
“Rreth orës 18:50, tek Ish Stacioni i Trenit, në afërsi të një lokali, persona ende të paidentifikuar pas një konflikti të çastit për motive të dobëta, kanë goditur me mjet prerës (thikë) shtetasin E. K., i cili ndodhet në spital, nën kujdesin e mjekëve”.
Ngjarjet e tilla janë shtuar shumë ditët e fundit në kryeqytet dhe sulmet me thika ose me mjete tjera ta forta, janë një shqetësim real për shoqërinë shqiptare.
