Kreu i Partisë Demokratike, Lulzim Basha ka deklaruar se nuk do e çojë para projektin e mini-shengenit ballkanik të nisur nga Edi Rama. Në Syri Tv Basha ka deklaruar se me Kosovën do të ketë njehtësim dhe kjo nuk do të përfshijë shtete të tjera.
“Njehtësimi do të thotë që ne do të fillojmë të marrim masat konkrete që të operojmë si një treg i vetëm, që do të thotë që diploma e lëshuar në Prishtinë do të njihet në Tiranë pa asnjë…
Njehtësimi është më shumë se kaq. Një biznes i riregjistruar në Kosovë nuk do ketë nevojë të marrë asnjë certifikatë në Shqipëri dhe anasjelltas, që një pronë e riregjistruar në Kosovë do t’i njihen dokumentet e pronësisë të kadastrës së Kosovës, të hipotekës së Kosovës dhe anasjelltas. Synimi ynë do të jetë njehtësimi ekonomik. Shikoni gjithë procesi i anëtarësimit në BE ka një qëllim, që rregullat tona dhe zbatimi i këtyre rregullave të jenë njësoj si në Sarandë ashtu dhe në Stokholm. Prandaj është një proces i vështirë që kërkon vullnet politik dhe kërkon provojë, eksperiencë dhe lidhje”, ka thënë Basha.
I pyetur nëse do e vazhdojë projektin e minishengenit që është mbështetur edhe nga BE e Gjermania, Basha ka thënë se në këtë çështje nuk mund të injorohet problemi më i madh, që është mosnjohja e Kosovës nga Serbia.
“Bëhet fjalë për njehtësimin, në këtë mënyrë ne do të jemi të gatshëm kur të vijë dita për integrimin europian 2 vendet tona krah për krah drejt anëtarësimit në BE. Nuk ka projekt minishengeni.
Nuk ka minishengen ballkanik, ka proces të Berlinit dhe ka një proces në të cilin nuk mund të përparohet pa zgjidhur problemin më të madh. Nuk mund të injorojë Serbia në dhomë do të thotë hajt se po bëjmë minishengen pa njohur Kosovën”, deklaroi Basha.
