Ambasadori i Bashkimit Europian në Shqipëri, Luiggi Soreca i ka bërë thirrje partive politike dhe kandidatëve të tyre që të përqendrohen në programet përkatëse dhe reformat që ata synojnë të paraqesin për të përmirësuar jetën e qytetarëve. Në një postim në Twitter Soreca shkruan se ai pajtohet me kreun e Komisonit Qendror të Zgjedhjeve, Ilirjan Celibashin dhe se ka besim se të gjitha institucionet dhe aktorët politikë do të veprojnë në përputhje me standardet ndërkombëtare në vendimet që marrin.
Postimi i Soreca-s:
Ne pajtohemi me Ilirian Celibashin. Partitë politike dhe kandidatët duhet të përqendrohen tani në programet e tyre përkatëse politike dhe në reformat që ata synojnë të paraqesin për të përmirësuar jetën e të gjithë qytetarëve shqiptarë. Ne kemi besim në të gjitha institucionet përkatëse dhe politike. Aktorët të veprojnë në përputhje me standardet ndërkombëtare dhe me vendimet.
Kujtojmë që ditët e fundit ka pasur debate të shumta mes palëve politike në lidhje me modelin e fletës së votimit. Kolegji Zgjedhor vendosi që të miratonte formatin e propozuar nga Partia Socialiste, për shënimin e kandidatëve me numra, ndërsa PD kishte kërkuar që kandidatët të paraqiteshin me emër në fletën e votimit. Gjithashtu ka pasur një fushatë agresive nga ana e PS, ndërkohë që Partia Demokratike ka vazhduar grumbullimet me qytetarët.
