Ndalimi i grumbullimeve në ambientet e mbyllura është shtyrë deri në datën 8 prill. Në vendimin e qeverisë thuhet se ndalimi i grumbullimeve me më shumë se 10 persona do të jetë në fuqi deri në datën tetë prill dhe atëherë Komiteti Teknik i Ekspertëve do të marrë një vendim të dytë.
Vendimi është botuar tashmë në fletoren zyrtare, ku më parë afati për këtë kufizim ka qenë data 25 mars, ndërsa tashmë është zëvendësuar me togfjalëshin “deri në datën 8.4.2021”.
Kujtojmë që Gjykata Kushtetuese mori në shqyrtim kërkesëne Partisë Republikane për lejimin e tubimeve dhe i la afat Komitetit Teknik që të rishqyrtonte masat kufizuese në fuqi. Këta të fundit vendosën që të vazhdohej me ndalimin e grumbullimeve me më shumë se 10 persona, duke marrë parasysh shifrat e larta të infektimeve.
Ndërkohë në fuqi janë edhe masa të tjera kufizuese si ora policore nga 20:00 e mbrëmjes deri në 06:00 të mëngjesit. Po ashtu mësimi për universitetet do të vazhdojë online ndërsa Komiteti mori ditën e djehsme vendimin që maturantët të rikthehen në klasa.
Ndërkohë, partitë politike në vend kanë mbajtur grumbullime në kundërshtim me rregullat në kuadër të fushatës elektorale, ndërsa për këtë nuk ka pasur reagim dhe masa të ndërmarra nga institucionet përkatëse.
