Dita e sotme, është e katërta që nga nisja e vaksinimit masiv të moshuarve në sheshin “Skënderbej”. Ministrja e Shëndetësisë, Ogerta Manastirliu, deklaroi pas një inspektimi të procesit që po vijon, se gjatë muajit prill do të vijnë edhe 20 mijë dozat e vaksinave anti-Covid nga kompania farmaceutike, “Pfizer”. Sipas Manastirliut, java e parë e muajit prill, do të nisë me mbërritjen e 7 mijë dozave të këtyre vaksinave.
“Jemi në pritje të vijimit të furnizimit me vaksina, presim nga kontrata me kompaninë Pfizer, të kemi sërish gjatë prillit rreth 20 mijë doza. Brenda javës së parë presim 7 mijë dozat e para dhe më tej deri në datën 19, 20 mijë doza”, tha fillimisht Manastirliu.
“Më tej, sipas kalendarit, presim dhe dozat e blera nga kompania turke. Gjithashtu do vijojmë me intensifikimin e gjithë procesit të vaksinimit.
Të gjithë ekipet e vaksinorëve po bëjnë një punë shumë të mirë, në tre ditë radhazi kemi kryer në 50 mijë vaksinime, që tregon që kapacitetet tona janë të mjaftueshme e jemi të përgatitur të rrisim numrin e vaksinimeve”, përfundoi ministrja e Shëndetësisë, Ogerta Manastirliu.
Vaksinimi masiv në sheshin “Skënderbej” në kryeqytet, nisi ditën e diel dhe mesatarja e të vaksinuarve për një ditë, ka qenë rreth 12 mijë persona.
https://www.facebook.com/OgertaManastirliu/videos/461272091590726
