Kreu i PD, Lulzim Basha ka qenë në një takim me fermerët në Roskovec ku ka thënë se qeveria nuk i ka mbështetur ata dhe se 25 prilli është dita kur karta ID e fermerit nuk do të ketë nevojë për NIPT. Basha ka premtuar se do të zerojë koston e prodhimit në mënyrë që djersa e fermerëve të ktheeht në kuptim domethënës.
“25 prilli është dita kur do të keni mundësinë që ose të ikni nga kjo rrugë, o të vazhdoni me mua dhe pas 25 prillit do të jetë karta ID e fermerit, nuk do të ketë nevojë për nipt. Dhe 50 milionë euro në vit për infrastrukturat, aksesin në tregje, frigoriferët, magazinimin, në mënyrë që asnjë produkt të mos shkojë kot. Përmes këtij programi duam të garantojmë që produktet tuaja të shkojnë në tregun shqiptar me çmime konkurruese. Përmes kësaj do të arrijmë që jo thjesht të nxjerrim bukën e gojës, por të zerojmë koston e prodhimin dhe djersa juaj të kthehet në kuptim domethënës… Me subvencionet ne do të arrijmë që familjet shqiptare t’i kalojmë nga faza e mbijetesës, ti kalojmë në fazën e sipërmarrjes. Bujqësia ka të paparashikuara, që nuk janë tipike për aktivitete të tjera. Pikërisht për të zbutur efektet të atyre që s’kemi në dorë, si moti, disa nga sëmundjet, për të zhdukur këto, qeveritë japin subvencione, me këto minimizohen kostot e fidanëve, plehrave kimikë. Do të shpëtoni nga karburantet. Tek ne është më i shtrenjti në botë, kryesori është taksa Rama…Ne do ju mbështesim që të eksportoni prodhimet tona”, ka thënë Basha.
Më tej ai ka deklaruar se ambicia e tij është t’i kthejë fermerët shqiptarë në kulakë të pasur e krenarë për tokën e prodhimin e tyre.
“Janë të gjitha të mundura. Sot dikujt mund të duket e pamundur. Por unë ju them bëhuni gati për një Shqipëri që punon dhe krijon mirëqenie për veten dhe familjen e vet. Ambicia ime është të kthej fermerët shqiptarë në kulakë të pasur dhe krenar. Krenar për tokën dhe prodhimin e tyre. Shtresë e mesme. Njerëz që prodhojnë të mira janë fisnikëri që do e mbushni me gëzim këtë qeveri. Ne do ta bëjmë këtë realitet se një shekull i ri ka trokitur nuk na mungon dija për këtë realitet. Janë prioritet absolute.” tha Basha.
